Malbavka Îsa Mesîh

       1 ¹Kitêba malbavka Îsa* Mesîhê* kurê Dawid* ê kurê Birahîm ev e:

                ²Birahîm bavê Îshaq bû,

                Îshaq bavê Aqûb* bû,

                Aqûb bavê Cihûda* û birayên wî bû,

                ³Cihûda bavê Perez û Zerah bû, ku diya wan Tamara bû,

                Perez bavê Hesrûn bû,

                Hesrûn bavê Ram bû,

                ⁴Ram bavê Amînadav bû,

                Amînadav bavê Nehşon bû,

                Nehşon bavê Salmon bû,

                ⁵Salmon bavê Bowaz bû, ku diya wî Rexab bû,

                Bowaz bavê Ovêd bû, ku diya wî Rût bû,

                Ovêd bavê Yêşa bû

                ⁶û Yêşa jî bavê Dawid* padîşah bû.

                Dawid bavê Silêman bû, ku berê diya wî jina Ûrya bû,

                ⁷Silêman bavê Rêhoboam bû,

                Rêhoboam bavê Ebiya bû,

                Ebiya bavê Asa bû,

                ⁸Asa bavê Yehoşafat bû,

                Yehoşafat bavê Yoram bû,

                Yoram bavê Ûzya bû,

                ⁹Ûzya bavê Yotam bû,

                Yotam bavê Ahaz bû,

                Ahaz bavê Hizqiya bû,

                ¹⁰Hizqiya bavê Minaşe bû,

                Minaşe bavê Amon bû,

                Amon bavê Yoşya bû

                ¹¹û Yoşya jî bavê Yexonya û birayên wî bû,

                ku di dema sergombûna* Babîlê de çêbûn.

                ¹²Yexonya bavê Şaltiyêl bû, ku piştî

                sergombûna Babîlê çêbû,

                Şaltiyêl bavê Zerûbabel bû,

                ¹³Zerûbabel bavê Abiyûd bû,

                Abiyûd bavê Êlyaqîm bû,

                Êlyaqîm bavê Azûr bû,

                ¹⁴Azûr bavê Sadoq bû,

                Sadoq bavê Axîn bû,

                Axîn bavê Êlyûd bû,

                ¹⁵Êlyûd bavê Êlazar bû,

                Êlazar bavê Metan bû,

                Metan bavê Aqûb bû

                ¹⁶û Aqûb jî bavê Ûsivê mêrê Meryemê bû.

                Ji Meryemê jî Îsa*, yê ku jê re Mesîh* tê gotin çêbû.

        ¹⁷Bi vî awayî ji Birahîm heta Dawid çardeh nifş, ji Dawid heta sergombûna* Babîlê çardeh nifşên din û ji sergombûnê heta Mesîh jî çardeh nifş derbas bûn.

Bûyîna Îsa Mesîh

        ¹⁸Bûyîna* Îsa* Mesîh* jî bi vî awayî çêbû: Diya wî Meryem dergistiya Ûsiv bû, lê berî ku ew bizewicin û bigihîjin hev, xuya bû ku ew bi Ruhê* Pîroz* bizaro* ye. ¹⁹Dergistiyê* wê Ûsiv mirovekî* rast bû û ji ber ku nedixwest Meryemê li pêş xelkê bide şermê, wî niyet kir ku wê bi dizî berde. ²⁰Ew hê li ser vê yekê difikirî, milyaketekî Xudan* di xewnê de lê xuya bû û got: "Ey Ûsivê kurê Dawid*! Netirse ku tu Meryemê ji xwe re bi jinîtî bînî. Çimkî yê ku di malzaroka wê de çêbûye ji Ruhê Piroz* e. ²¹Ewê kurekî bîne û tê navê wî Îsa* deynî, çimkî ewê gelê xwe ji gunehên wan rizgar* bike." ²²Ev hemû çêbûn, da ku gotina Xudan* a ku bi devê pêxember* gotiye bê cih:

                ²³"Va ye, wê keçik bizaro* bibe û ewê kurekî bîne.

                Û wê navê wî Îmanûêl deynin,"

ku tê wergerandin: "Xwedê bi me re ye."

        ²⁴Gava ku Ûsiv ji xewê hişyar bû, emirê milyaketê Xudan* anî cih û Meryem ji xwe re bi jinîtî anî. ²⁵Lê ew neçû ba wê, heta ku wê kurê xwe anî. Û wî navê zarok Îsa danî.

Stêrnasên ji Rojhilat

       2 ¹Îcar di dema Hêrodês* padîşah de, çaxê Îsa* li Beytlehma Cihûstanê* çêbû, ji Rojhilat stêrnas hatin Orşelîmê* ²û pirsîn: "Ka padîşahê Cihûyan ê ku çêbûye li ku derê ye? Me li Rojhilat stêra wî dît û em hatin ku biperizin* wî." ³Gava ku Hêrodês padîşah ev yek bihîst, ew û hemû Orşelîm jî pê re bizdiya. ⁴Wî hemû serekên kahînan* û Şerîetzan* li hevdû civandin û ji wan pirsî, ka wê Mesîh* li ku derê çêbibe. ⁵Wan jê re got: "Li Beytlehma Cihûstanê, çimkî bi destê pêxember* weha hatiye nivîsîn:

                ⁶'Û tu, ey Beytlehma li welatê Cihûstanê! Tu di nav

                serdarên Cihûstanê de bi tu awayî ne ya herî kêm î.

                Çimkî wê ew serdarê ku şivantiya gelê min ê Îsraêl*

                bike ji te rabe!'"

⁷Li ser vê yekê Hêrodês bi dizî gazî stêrnasan kir û ji wan qenc hîn* bû ku stêr kengê xuya bûye. ⁸Di pey de wî ew şandin Beytlehmê û ji wan re got: "Herin û qenc li zarok bigerin. Gava ku we ew dît, haya min pê bixin, da ku ez jî bêm û biperizim* wî." ⁹Piştî bihîstina gotina padîşah ew ketin riya xwe. Ew stêra ku li Rojhilat dîtibûn li pêşiya wan çû, heta li ser cihê ku zarok lê bû rawesta. ¹⁰Gava ku wan jî stêr dît, bi şahiyeke mezin dilgeş bûn. ¹¹Ew ketin malê û zarok bi diya wî Meryemê re dîtin, çûn ser çokan û perizîn* wî. Sindoqa xwe ya xezînê vekirin û diyariyên ji zêr, bixûr* û nardê* pêşkêşî* wî kirin. ¹²Piştî ku di xewna xwe de hatin tembîhkirin, da ku venegerin ba Hêrodês, ew di riyeke din re çûn welatê xwe.

Bi Misirê ve revîn

        ¹³Piştî çûyîna stêrnasan, milyaketekî Xudan* di xewnê de li Ûsiv xuya bû û got: "Rabe, rahêje zarok û diya wî û bireve Misirê. Li wê derê bimîne heta ku ez ji te re bêjim. Çimkî Hêrodês wê li zarok bigere, da ku wî bikuje." ¹⁴Hingê Ûsiv rabû, rahişt zarok û diya wî û bi şev çû Misirê ¹⁵û heta mirina Hêrodês li wê derê ma. Û bi vî awayî ew peyva* Xudan, ya ku bi devê pêxember* gotibû hat cih: "Min ji Misirê gazî kurê xwe kir."

Kuştina zarokan

        ¹⁶Gava Hêrodês fêm kir ku ji aliyê stêrnasan ve hatiye xapandin, gelek hêrs* bû. Li ser vê yekê, tam li gor wî çaxê ku ji stêrnasan hîn* bûbû, li Beytlehm û li hemû der û dora wê fermana kuştina hemû zarokên kurîn ên du salî û ji diduyan biçûktir derxist. ¹⁷Û bi vî awayî ew peyva* ku bi devê Yêremya pêxember* hatibû gotin hat cih:

                ¹⁸"Ji Ramayê dengek hat bihîstin,

                         Şîn û girîn û li xwe xistin!

                Rahêl* ji bo zarokên xwe digirî

                         Û ew naxwaze bê aşkirin.

                Çimkî êdî ew nînin."

Vegerîna ji Misirê

        ¹⁹Piştî ku Hêrodês mir, milyaketekî Xudan* li Misirê di xewnê de li Ûsiv xuya bû ²⁰û got: "Rabe, rahêje zarok û diya wî û vegere welatê Îsraêlê, çimkî ew ên ku li kuştina zarok digeriyan mirin." ²¹Îcar Ûsiv rabû, zarok û diya wî hildan û vegeriyan welatê Îsraêlê. ²²Lê gava wî bihîst ku Arxêlayo* di cihê bavê xwe Hêrodês de li herêma Cihûstanê* bûye padîşah, ew tirsiya ku here wê derê. Piştî ku di xewnê de hat tembîhkirin, bi aliyê Celîlê* ve çû. ²³Li wir, li bajarê ku jê re dibêjin Nisret bi cih bû. Bi vî awayî ew peyva ku bi devê pêxember hatibû gotin hat cih: "Wê ji wî re 'yê Nisretî' bê gotin."