Îsa û Yûhennayê imadkar

       11 ¹Piştî ku Îsa şîret li her diwanzdeh şagirtên xwe kir, ew ji wir çû bajarên wan, da ku hîn* bike û Mizgîniyê bide.

        ²Gava Yûhenna* di girtîgehê de bihîst ku Mesîh çi dike, wî şagirtên xwe şandin ba wî ³ku ji wî bipirsin: "Ma ewê ku wê bihata tu yî, an divê em li benda yekî din bimînin?" ⁴Îsa weha li wan vegerand: "Herin tiştên ku we bihîstine û dîtine ji Yûhenna re bêjin: ⁵Kor dibînin, şil û şeht rêve diçin, kotî paqij dibin, ker dibihîzin, mirî radibin û Mizgînî digihîje belengazan. ⁶Xwezî bi wî kesî ku li ser min nekeve şikê."

        ⁷Gava ku şagirtên Yûhenna diçûn, Îsa dest pê kir û ji elaletê* re li ser Yûhenna peyivî: "Hûn çûn çolê ku çi bibînin? Ma çîtikeke ku li ber bayê diheje? ⁸Heke na, hûn çûn ku çi bibînin? Ma mirovekî ku cilên nermîn li xwe kirine? Va ye ew ên ku cilên nermîn li xwe dikin di qesrên padîşahan de ne. ⁹Naxwe hûn derketin ku çi bibînin? Ma pêxemberekî? Erê, ez ji we re dibêjim ku ji pêxemberekî jî meztir e. ¹⁰Ev ew e yê ku weha li ser wî hatiye nivîsîn:

                'Va ye, ez qasidê xwe li pêşiya te dişînim,

                Ewê beriya te riya te amade bike.'

¹¹Bi rastî ez ji we re dibêjim: Di nav ên ku ji jinan bûne de, yekî ji Yûhennayê imadkar* meztir derneketiye. Lê di Padîşahiya Ezmanan de yê herî biçûk ji wî meztir e. ¹²Ji roja Yûhennayê imadkar û heta niha, Padîşahiya Ezmanan bi zorê li ber xwe dide û yên zordar wê bi dest dixin. ¹³Çimkî hemû pêxemberan û Şerîetê heta dema Yûhenna pêxemberîtî kirin. ¹⁴Û heke hûn bixwazin bipejirînin, Êlyasê ku diviya bihata ew e. ¹⁵Yê ku guhên wî hene bila bibihîze.

        ¹⁶"Îcar ez vî nifşî bişibînim çi? Ew mîna wan zarokan in ku li meydanan rûniştine û gazî hevdû dikin ¹⁷û dibêjin: 'Me ji bo we li bilûrê xist, lê hûn nereqisîn; me lorand, we şîn negirt.' ¹⁸Çimkî Yûhenna hat, ne dixwar û ne jî şerab vedixwar, lê ew dibêjin: 'Cinên wî hene.' ¹⁹Kurê* Mirov hat, dixwe û vedixwe, îcar dibêjin: 'Va ye xwere û serxweş, hevalê bacgir * û gunehkaran. Lê şehrezayî bi kirinên xwe rast kifş dibe.'

Bajarên bêbawerî

        ²⁰Hingê Îsa dest pê kir li wan bajaran hilat*, ku di wan de gelek keramet nîşan dabûn. Çimkî ew ji gunehên xwe venegeriyabûn. ²¹"Wey li te Xorazînê! Wey li te Beytsaydayê! Heke ew kerametên ku li nav we hatin kirin, li Sûr* û Saydayê bihatana kirin, ewê ji zû ve di nav xirarî* û xweliyê de ji gunehên xwe vegeriyana. ²²Lê ez ji we re dibêjim, di roja hukum de wê rewşa Sûr û Saydayê ji ya we çêtir be. ²³Û tu hey Kefernahûm! Ma tê heta bi ezmanan bêyî bilindkirin? Na, tê heta bi diyarê* miriyan herî xwarê. Heke ew kerametên ku li nav te hatin kirin, li Sodomê* bihatana kirin, ewê heta îro li cihê xwe bima. ²⁴Lê ez ji we re dibêjim ku wê di roja hukum de rewşa Sodomê ji ya we çêtir be."

Îsa ji Bavê xwe re şikir dike

        ²⁵Hingê Îsa got: "Ez ji te re şikir dikim, ey Bavo*, Xudanê erd û ezmên! Çimkî te ev tiştên ha ji şehreza û aqilmendan veşartin û ji zarokên biçûk re diyar kirin. ²⁶Erê Bavo, çimkî li ba te ya bi dil ev bû.

        ²⁷"Her tişt ji aliyê Bavê min ve ji min re hat dayîn. Ji bilî Bav * tu kes bi Kur nizane û ji bilî Kur û yên ku Kur dixwaze Bav bi wan bide naskirin tu kes jî bi Bav nizane.

        ²⁸"Werin ba min, ey hemû yên westayî û bargiran, ezê rihetiyê bidim we. ²⁹Nîrê min deynin ser stûyê xwe û ji min hîn* bibin. Çimkî ez dilovan û ji dil nefsbiçûk im, hûnê rihetiyê ji bo canê xwe bibînin. ³⁰Çimkî nîrê min hêsanî û barê min sivik e."