Îsa ji pêşî ve li ser Wêranbûna Perestgehê Dibêje

         24 ¹ Gava ku Îsa ji Perestgehê derket û çû, şagirtên wî nêzîkî wî bûn û xwestin ku bala wî bikişînin ser avahiyên Perestgehê. ² Wî ji wan re got: «Hûn van hemûyan dibînin? Bi rastî ez ji we re dibêjim, li vir kevir li ser kevir namîne. Qet tiştek namîne ku neyê hilweşandin!»

Tengahiyên Mezin

         ³ Çaxê Îsa li Çiyayê Zeytûnê rûdinişt, şagirtên wî bi serê xwe hatin ba wî û jê re gotin: «Ji me re bêje, ka ev tişt wê kengê bibin? Çi wê bibe nîşana hatina te û dawiya dinyayê?» ⁴ Îsa bersîva wan da û got: «Hay ji xwe hebin, ku tu kes we nexapîne. ⁵ Çimkî gelek wê bi navê min bên û bêjin: ‹Mesîh ez im› û wê gelekan bixapînin. ⁶ Hûnê dengê şeran û li ser şeran bibihîzin. Binêrin! Hûn netirsin. Tiştên weha divê bibin, lê hê dawî nehatiye. ⁷ Milet wê li hember miletan, padîşahî li hember padîşahiyan rabin. Û wê li cih cihan xela û erdhejîn çêbin. ⁸ Lê ev tiştên ha hemû destpêka janan in.

         ⁹ «Hingê wê we teslîm bikin, da ku êşê bi we bidin kişandin û we bikujin. Ji ber navê min hemû milet wê ji we nefret bikin. ¹⁰ Hingê gelek wê ji rê derkevin, hevdû bidin dest û ji hev nefret bikin. ¹¹ Û gelek pêxemberên derewîn wê derkevin û gelekan bixapînin. ¹² Bi zêdebûna neheqiyê, hezkirina gelekan wê sar bibe. ¹³ Lê yê ku heta dawiyê ragire*, ewê xilas bibe. ¹⁴ Û ev Mizgîniya Padîşahiyê wê li seranserê dinyayê bê dayîn, da ku ji hemû miletan re bibe şahidî û hingê dawî wê bê.

Felaketa Mezin

         ¹⁵ «Çaxê hûn tiştê mekruh ê ku xerakirinê tîne, tiştê ku Daniyêl pêxember gotiye, li cihê pîroz rawestayî bibînin» – bila yê ku dixwîne fêm bike – ¹⁶ «hingê yên ku di Cihûstanê de ne bila birevin çiyan. ¹⁷ Yê ku li ser banî be, bila neyê xwarê û tiştekî ji hundir hilnede. ¹⁸ Û yê ku li nav zeviyê be jî, bila venegere ku ebayê xwe hilde. ¹⁹ Lê wey li wan ên ku di wan rojan de bizaro ne û dimêjînin! ²⁰ Dua bikin ku reva we nekeve zivistanê an roja* Şemiyê. ²¹ Çimkî hingê tengahiyeke wusa mezin wê çêbe, ku ji destpêka dinyayê ve tiştekî weha çênebûye û tu caran çênabe jî. ²² Eger ew roj nehatana kurtkirin, tu kes xilas nedibû, lê ji bo xatirê yên bijartî ew roj wê bên kurtkirin. ²³ Hingê eger yek ji we re bêje: ‹Va ye, Mesîh li vir e!› an jî: ‹Wa ye, ew li wir e!›, bawer nekin. ²⁴ Çimkî mesîhên derewîn û pêxemberên derewîn wê derkevin, wê nîşan û karên mezin çêkin, wusa ku eger bibe, ewê bijartiyan jî bixapînin. ²⁵ Va ye, min ji pêşî ve ev ji we re got. ²⁶ Îcar, eger yek ji we re bêje: ‹Wa ye, Mesîh li çolê ye!› dernekevin derve, an bêje: ‹Va ye, li oda hundir e!›, bawer nekin. ²⁷ Çawa ku birûsk ji Rojhilat davêje û heta Rojava ronahî dike, hatina Kurê Mirov jî wê bi vî awayî be. ²⁸ Kelaş li ku derê be, teyrên kelaşan jî wê li wê derê bicivin.

Vegerîna Kurê Mirov

         ²⁹ «Di pey tengahiya wan rojan de, di cih de,

                  Roj wê tarî bibe

                  Û heyv ronahiya xwe nade.

                  Stêr wê ji ezmên bikevin

                  Û rojgêranên* ezmanan wê ji riya xwe derkevin.

         ³⁰ «Hingê nîşana Kurê Mirov wê li ezmên xuya bibe û hemû miletên li ser erdê wê li xwe bixin. Ewê bibînin ku ‹Kurê Mirov bi hêz* û rûmeta mezin li ser ewrên ezmên tê.› ³¹ Ewê milyaketên xwe bi boriya dengbilind bişîne û milyaket wê bijartiyên wî ji çar aliyan, ji perekî ezmanan heta perê din bicivînin.

Dersa ji Dara Hêjîrê

         ³² «Îcar ji dara hêjîrê vê dersê hîn bibin: Çaxê ku çiqilên wê dibişkivin û pelên wê şîn dibin, hûn dizanin ku havîn nêzîk e. ³³ Bi vî awayî, çaxê ku hûn jî van hemû tiştan bibînin, bizanin ku ew nêzîk e, li devê derî ye. ³⁴ Bi rastî ez ji we re dibêjim, heta ku ev tiştên ha hemû çênebin, ev nifş qet nabihûre. ³⁵ Erd û ezman wê bibihûrin, lê peyvên min tu caran nabihûrin.

Roj û Saeta ku Bi Tenê Xwedê Dizane

         ³⁶ «Lê heçî ew roj û ew saet e, ne milyaketên ezmanan û ne jî Kur, ji Bav pê ve tu kes pê nizane. ³⁷ Ka di rojên Nûh* de çawa bû, hatina Kurê Mirov jî wê wusa be. ³⁸ Çimkî di wan rojên beriya tofanê de, mirovan dixwar û vedixwarin, jin dianîn û mêr dikirin; heta wê roja ku Nûh ket gemiyê, ³⁹ wan nizanibû ku wê çi bibe, heta ku tofan rabû û ew hemû bi xwe re birin. Hatina Kurê Mirov jî wê bi vî awayî be. ⁴⁰ Hingê du mirov wê li nav zeviyê bin, yek wê bê birin û yek bê hiştin. ⁴¹ Du jin wê bi destar bihêrin, yek wê bê birin û yek bê hiştin.

         ⁴² «Loma hişyar bimînin, çimkî hûn nizanin Xudanê we wê kîjan rojê bê. ⁴³ Lê vê yekê bizanin: Eger malxwê malê bizaniya ku bi şev çi çaxî diz wê bê, ewê hişyar bima û nedihişt ku ew bikeve xaniyê wî. ⁴⁴ Ji ber vê yekê hûn jî amade bin, çimkî Kurê Mirov wê di saetekê de bê ku hûn nizanin.

Xulamê Dilsoz û Xulamê Bêbext

         ⁴⁵ «Xulamê dilsoz û şehreza kî ye? Ewê ku axayê wî ew daniye ser xulamên xwe, da ku xwarina wan di dema wan de bide wan. ⁴⁶ Xwezî bi wî xulamê ku gava axayê wî bê, wî li ser karê wî bibîne. ⁴⁷ Bi rastî ez ji we re dibêjim, ewê wî deyne ser hemû malê xwe. ⁴⁸ Lê eger ew xulamê xerab ji xwe re bêje: ‹Axayê min wê bi derengî bikeve› ⁴⁹ û dest pê bike li hevalên xwe yên xulam bixe, bi serxweşan re bixwe û vexwe, ⁵⁰ axayê wî xulamî wê di wê rojê de bê ku ew ne li hêviya wî ye û di wê saetê de ku ew pê nizane ⁵¹ û wê wî perçe perçe bike û para wî bi durûyan re bide. Li wir wê bibe girîn û qirçîna diranan.